Erabiltzaileak

JOXEMI ZUMALABE FUNDAZIOAk Euskal Herriko herri eta gizarte mugimenduan kokatzen diren pertsona, elkarte, antolakuntza, mugimendu eta beste edozein adierazpen organizatibori zerbitzua emateko asmoa du.

Herri mugimendutzat dugu politika ofizialetik kanpo herritarron premia zehatzei erantzuteko sortu den antolamendu mota oro. Herri mugimenduak zuzeneko partehartzea eta elkartasuna defendatzen ditu, eskuordetzarik gabe eta konpetitibitatearen aurka. Hitz batez esateko, gaur egun gizarte alternatibo baten oinarri diren baloreak bultzatzen dituena da herri mugimendua.

Alor ezberdinei ekinez, herri mugimendua gizarte arazo anitzei irtenbideak ematen saiatzen da. Fundazioak bultzatzen duena Euskal Herrian sustraitua eta gure herria, Euskal Herria, helburu duen herri mugimendua izango da. Izan ere, herri mugimenduak argi erakutsi baitu herri eraikuntzarekin duen konpromiso nabarmena.